Амыр ХОЮГБАН

МЕН ТЫВА МЕН...

Мен тыва мен -
Меңги-дошка тайган тыва мен.
Мен тыва мен -
Меге сөске тоткан тыва мен.

Эрте бурун түүрүктерниң
Эргиндизи тыва мен.
Иргиттерниң, Сояннарның
Ириндизи тыва мен.
Ооржактарның, Ондарларның
Орбандызы тыва мен.
Ховалыглар, Монгуштарның
Хоюткузу тыва мен.

Чиңгис-Хаанның чагыгларын
Чидирипкен тыва мен.
Сүбедейниң сүмелерин
Чүдереткен тыва мен.
Чүс-чүс чылда кыдаттарга
Шүүрерткен тыва мен.
Совет төре кежиин дилеп
Човай берген тыва мен.

Хоор малдың одарлары
Хоозураан тыва мен.
Чээренниң когун үзүп
Сээдеңнээн тыва мен.
Үүжеде ажык-байлаан
Үптеттирген тыва мен.
Демир-орук бурганчыдып
Тений берген тыва мен.

Тотпас хырын оорларга
Тоймаглаткан тыва мен,
Чашпан тыртып медерелин
Чандырыпкан тыва мен.
Араганы ижип алгаш
Албыстай бээр тыва мен.
Пивону ижип алгаш
Бижек чаяр тыва мен.

Хары черден ыдык ырны
Кавырактаан тыва мен.
Үе демдээ тураскаалды
Үреп каапкан тыва мен.
Садыгжылар, мөлчүкчүлер
Чазак баштан тыва мен,
Ыянчыг-ла каадырлар
Яамы баштан тыва мен.

Бадылаарда чүс хуу соңгуур
Партиялыг тыва мен.
Бардам сөстүг, мегелей бээр
Баштыңчылыг тыва мен.
Дайынны ол чарлаптарга
Таарзынар тыва мен.
Эжелекчи херектерин
Экизинер тыва мен.

Актыг черге даргаларын
Адып-боолаан тыва мен.
Сүртээшкинче арат-чонну
Сүре берген тыва мен.
Соңгулданы меге-биле
Солуп капкан тыва мен.
Чоннуң төлүн чагыргаже
Чоокшулатпас тыва мен.

Адааргалдан, идээргелден
Адырылбас тыва мен.
Чаагай сеткил, кээргел сөстен
Чарлып алган тыва мен.
Ынакшылдан, найыралдан
Ырай берген тыва мен.
Салгалдарның келир өйүн
Чашканнапкан тыва мен.

Мен тыва мен -
Меңги-дошка тайган тыва мен.
Мен тыва мен -
Меге сөске тоткан тыва мен.